مأساة طالبـة ... قصه حقيقية

مأساة طالبـة ... حقيقية ،‘ \
/
بدايـة ،،
اسمي ليان ... اكتب لكم قصتي حاليا و انا ابلغ من العمر الـ 22 سنـة ..
طبعا هالقصه قديييمه وحدثت لي ايـام الإبتدائي و المتوسطه لكنها للأسف إلى الان ملآحقتني ،،
كنت في الصف الثاني الإبتدائي كنا مجموعة بنات .. انا و كم من بنت معاي وفي مجموعة ثانيه ..
ماكنا نحب بعضضض أبدااااااااااا وأي شي يسونه لازم نسوي عكسه عشان يخرب عليهم !
يعني لعانه وهم نفس الحـاله
لين مع الوقت سبحان الله مدري كيف اجتمعنا وصرنا صديقاااااااات مقربات بعد
وكبرنا مع بعض لين ماوصلنا لـ المرحلة المتوسسطة ،‘
بداية السنة كنا مع بعض قاعدين وسوالف و ضحك فجأه لفتت انتباهي بنت قاعده ورا مدري ليه حسيت اني ودي اتعرف عليها " وللاسف " صار و تعرفت عليها و دخلتها لـ قروبنا وصارت علاقتنا فيها جددددا قويه
لدرجـة ان القروب صار متعلق فيها بـ شكل غريب يعني لو ايش ماتطلب مستحيل يردونها وهي استغلت هالشي تتأمر على فلانه و على علانـة و هم مثل " الخرفـان ! " عندها .. سمي وابشري .. الا انـا ماكان يعجبني هالوضع أبددددا
طبعا انـا أول ماتعرفت عليها ما عطيت اسم عايلتها أي بـال يعني مافكرت اني اسال
ويوم سألت وقالت لي انصدددددددمت قالت لي ليييه ؟! قلت لها تقرب لك فلانه ؟! قالت لي إيه تعرفينها ؟! قلت إيه مرت خـالي ... وش تقرب لك ؟! قالت بنت عم ابوي ..
انبسطت بـ صلة القرابة و زادت علاقتنا .. و انتهت السنة و حنـا علاقتنا قووووووية مع بعض وكل يوم تقوى
بدت السنة الجديدة " ثاني متوسط "
ونفس الشي البنت ماتغيرت ماغير تتأمر على البنات وهم يطاوعونهـا ،،
جا يوم قالت لي " ليان .. شيلي شنطتي معاك انا بنزل وانتي جيبيها "
قلت لها " يـا مها شيليها بـ نفسك انا اغراضي وش كثرها مقدر اشيل زود عليها شنطتك ! "
طبعا ماعجبها ردي و اخذت شنطتها وهي حمقانه ونفسها في خشمها ونزلت تحت
ماعطيتها بـال لاني ماني بـ " خادمة " عندها .. كل وحدهـ تشيل اغراضها بـ نفسها ... ومابيها تتوقع اني راح اكون مثل باقي المجموعة سمي و ابشري و آمري ..!
ومن بعدها والبنت عرفتو الي بدت تبتعد يعني ماعجبها اني ماطاوعتها ... و بدت تغتر وتشوف نفسها علينا من حركات البنات معها كانت مثل مايقولون " مُقدسه " بالنسسبه لهم من يسمعون اسمها ينقزون ويفزون لها ..
مرت الاسـابيع وتعرفت على بنت جديده اسمها " ريم " .. و قوت علاقتي فيها فـ فضلتها هي على المجموعة .. عفوا على الخرفان !.. بالرغم من ان اهلي ماكانت عاجبتهم علاقتي فيها بس ماكانو يوضحون لي هالشي خصوصا امي اما ابوي احيانا يقط كلام لكني ماهتم ... بالنهاية هم مايعرفون البنت ولا يدرون عنها بـ شي و انا الي معاشرتها واشوفها يوميا موب امي ولا ابوي ..!!
صرت شوي شوي ابتعدت عن " مها " ... مو قصدي انهي علاقتي فيها لا كنا للحين ع علاقة بـ بعض لكن مو مثل قبل يعني ضعفت شوي ..
في يوم جتني ريم تقولي " انتي شلون متحملة مها انا اكرها و ما بلعتها ولا نزلت لي من زور ووووووووو..الخ " من هالكلام
قلت لها " حرام عليك ياريم لا تحكمين ع البنت و بعدين هي فيها صفات شينة لكن لا تنسين صفاتها الحسنة " ومن هالكلام محاولة اني اقنعها لكنها ماقتنعت
وصارت مها ماتحب ريم و العكسسس صارو اعداااء
و مع الوقت بديت احس ان مها تغيرت كثييييييييييييييييير ...
ماصارت تقعد معنا خصوصا معي انا
تحآول قد ماتقدر انها ماتكلمني قدام البنات
تحاول تبين لـ البنات انو علاقتها معاي مو قوية و جدا سطحية ولا بينا اي شي
لاحظت هالتغير عليها لكني ماتكلمت ولا قلت أي شي سكتت قلت مع الوقت هي بتجي و بتتكلم و بتقول كل الي في بـالها
مررت الأيــــام لين ماصار يوم " الثلاثاء " .. انا اصلا ماحب يوم الثلاثاء و مع الي صار زاد كرهي له مدري ليه
المهـم ... كان علينا فراغ الا ريم كانت مشغولة مع استاذه وماهي قاعدة معنا " انا والقروب " معاد مها ماكانت معنا
فـ سألت وحدهـ من البنات .. وش فيها مها ؟! تغيرت كثير ماصارت مثل أول .. صاير شي ؟!
سكتت البنت ولا تكلمت لكني حسيت ان في سالفة
رجعت و سألتها و أصريت اني اعرف كانت كل شوي تصرفني تقولي " سالفة سخيفة .. سالفة سخيفة ماعليك لا تحطين في بـالك " ليييييين ما اخيرا تكلمت قالت
" اسمعي ياليان .. انتي علاقتك في ريم كل مالها و تزود و بصراحه هالبنت محد فينا مرتـاح لها و بصراحه البنات صايرين يتكلمون عنك و عنها و سمعتكم صارت مش ولابد ! "
قلت لها بصدددمه " وشوووووو ! و مين الي صار يتكلم فينا ووش يقولون ؟!! "
قالت " امممممم .. الكل صار يتكلم فيكم بس انا ماعرف مين بالضبط الي تكلمت بس المهم انه ينقال ان في بنات شافوك انتي وياها في شاليهات و كنتو راكبين مع " شباب " ... والكل يقول ويدري انكم " تكلمون شباب " ..."
هي قالت هالكلمتين من جهه انا شهقت و نزلت دموعي من جهه و صرخت في وجها " من قااااااااال ؟! انا وريم نكلم ونطلع ؟! مييين قال وش هالكلااااااام ؟! "
طبعا الكلام كله ظلللللم و اختلاق وإلى الان انا مادري مين الي طلعت عننا هالكلام ولكني مو مسامحتها لا في دنيا ولا في اخرهـ و ان شا الله اني اشوف فيها يووم "
ماردت علي وصرت اصارخ بـ حاله هستيريه لين ما اغمى علي
يمكن تقولون مبالغ في ردة فعلي .. لكن انتو تخيلو ان صديقات و علاقتنا جدا قوية مع بعض بدو يبعدون خوفا ع نفسهم و ع سمعتهم ولا اهتمو فيني انـا صديقتهم الي من الإبتدائية فوق الـ 6 سنوات عششرة باعوها بـ ثواني وغير كذا سمعتييي الي صارت سيئة في هالمدرسه مع اني صار لي فيها سنوات والكل يعرفني من ايام الابتدائي و سمعتي كانت زي العسسل لين ماطلع هالكلام ..
يـوم قمت لقيت نفسـي في غرفة المصحـة
فتحت عيوني و الصصصصصدمه اني شفت مها واقفه شهقت قالت " ليااان ! وش فيييييك سلامات صار لك شي طمنيني عليك ؟! "
سكتت لـ ثواني مستغربه بعدين رديت عليها بصد قلت لها " يعني يهمك ؟! "
رجعت و تكلمت قالت نفس الكلام ... قلت لها " انتي لو يهمك امري ما انقلبتي علي خوفا على نفسك بس "
انصدمت مني قالت " يعني ماتبين تتكلمين ؟! "
قلت بصرخه " لأأأأ "
طلعت من الغرفه وهي عابسه وجها اما انا اااااخ بس لا تسألون عن حالتي وقتها شي ماينووووصف
قرب الدوام يخلص و انا نفسيتي زفت و كل مامشيت واشوف البنات يتكلمون فيني دموعي تنزل مرهـ ثانيه
من كثر البكي عيوني صارت حمراااا و تحررقني ..
رجعت من الدوام طول الطريق و انا ابكي لكن بدون صوت عشان ماينتبه اخـوي
وأول ماوصلت البيت دخلت غرفتي و صحت ليييين مادخت و نمت
قمت ع السسساعه 6 المغرب و انا إلى الان نفسيتي تعببانه بعد مادريت بهالكلام الي طلع عننا وشوه سمعتنا
طلعت من غرفتي وقعدت بالصاله كانت فاضيه مافيها الا اخوي الصغير
شوي طلعت امي من غرفتها و انتبهت لـ وجهي و جتني وهي خايفه " ليييان ؟! وش فيك ؟! وش فيها عيونك ؟! "
ماقدرت اسكت ضميتها و صرت ابكييييي بشكل هستيري يخووف
امي خافت وصارت تبكي معاي ماتدري وش السالفه لكنها كانت تبكي خوفا علي
شوي و هديت وقلت لامي السالفه كللللها قالت لي " ولا يهمك بكرا ابجيك لمدرسه "
مرت الأيـام طبعا جيت امي مافادت ولا أثرت على سمعتي أبببدا نفس ماهي زفت في زفت !
بالعكس زاد الموضوع سوء ووصل الكلام لـ المدرسات
والكل ابتعد عنـي صرت انا وريم بسسسسس ... لكن ريم اصلا كثيرة غياب لأنها مريضة فيها السكري ودائما يأثر على صحتها و تضتطر تغيب دائما
يعني اغلب الوقت كنت لحالي
مرت السنه و انا على هالحاله من أرجع من المدرسه أصيييح لين انام
صرنا ثالـث متوسسط ..
طبعا ريم نقلت من المدرسه قالت انا مالي قعده في هالمدرسه
وانا حاولت اني انقل لكني ماقدرت
بداية ثـالث متوسسط ..
الكل انصصصدم اني إلى الحين موجودهـ بالمدرسه
طبعا جو بنات جدد كثييييييييير وكل ماحاولت اني اصادق وحده فيهم وصل لها الكلام و بعدت عني
لين ماصرت ياأسه اني القى لي أحد كنت دائما بلحالي و خلآص زي ماتقولون تعودت على كـذا
ركزت كل انتباهي على دراستي وكنت احاول قد ما اقدر اني اتجاهل كلام البنات عني
كل يوم تسوء علاقتي في البنات ... لين ماوصلت لـ الهوآش و الضرب تخيلو !
بعد ماكنا صديقات صرنا اعداء و نتضارب بعد !
اذكر مرهـ كنت في الحمآم " الله يكرمكم " ... و مواجهه المرايه اغسل إيدي
يوم شافوني دخلت ... قامو دخلو و بدايتها كان هواش بالكلام سبب " يالصايعه يـاراعية العيال ها مين اخر واحد طلعتي معاه .. وش اسمه خويك ؟! .. لايكون واعدك بالزواج بس " و من هالكلام الحقير
انفجرت فيهم انتو وانتو وانتو وصراخ وهواش لين ماعصبت وحدهـ فيهم و دفتني صقع راسي بالجدار صقعه قوويه ماتألمت من الصقعه كثر ماتألمت من الموقف الي صـار ..
عاد انـا تعببت نفسيتي صارت زفت خلآص لين هنـا وبسسس ماقدر اتحمل اكثر من كذا
قلت لازم احط لهم حد ..مستحيل اسكت
رحت عند الإداره .. و توقعو ايش الصدمه .. قالو لي " انتي الغلطانه ! "
غلطوني انا البريئه و هم صححوهم ! في أي شرع هذا وش هالمخ وش هالعقلية !؟ الي مظلوم هو الغلطان ؟! اجل الظـالم وش ؟!
طلعت من الإداره و انا معصبه من ردهم علي و اخذت اغراضي و طلعت البيت ..
خلص الترم الأول و حنا حالتنا كذا و كل من في المدرسه من معلمات و إداريات و طالبات عرف بالسالفه و الي ماعرفت بالكلام الي طلع عني عرفت اننا تفرقنا ..
بدا الترم الثــاني ... ونفس الحالة ماتغير أي شيي الا بالعكس يمكن زاد الموضوع سوء ..
انتهت السسنه و انا حالفـه اني انقل مستحيل اقعد مستحيييييييييل !
دورت ودورت مدارس لين ماحصلت مدرسة قبلتني على طول و نفس الشي كانت اهليـة و مستواهم في التدريس مرتفع والكل يمدح فيها ..
وبعد الصيفية دخلت هالمدرسه ... و الصصصصصدمه مين كان موجود ؟!
وحدهـ من بنات المجموعة الي كانو صديقاتي ! يعني ولا كأني سووويت أي شي
ونفس الشي الكلام طلع عني في هالمدرسه بعد
تخيلو المدرسات صارو يخفسون درجـاتي بس عشان هالكلام ؟! بالله مو ظلم !!؟
لكن الحمد الله كان الحال في هالمدرسه اهون علي من حالتي في المدرسة القديمـة
صرت في الصف الثاني ثـنوي طبعا تغيرت كثييييييييير بعد هالسالفه صرت انطوائية و ماحب اتكلم مع الناس زي قبل ولا صرت احتك في الناس كثير وعلاقتي سطحية مع الكل ودائما حزينة و متضايقه ..
قمت الصبح ورحت الدوآم .. كان يوم طبيعي الا من شي واحد غريب !
في بنت دائما تطالع فيني وكأنها ودها تتكلم لكنها ساكته ولا تتكلم ..
قعدت ع هالحـال شهرين تقريبـا طبعا انا مافكرت اني اروح قلت يمكن الكلام وصل لها عشان كذا تتكلم ..
تخرجت من الثنوية الحمد الله بـ نسبة مرتفعه و دخلت الجامعه وصدفه ان نفس البنت الي كانت تطالع فيني موجودهـ معي في نفس القسم ..
بعد مرور الترم الأول من الجـامعه .. اخيرا البنت جتني و تكلمت ..
" مرحبا ليان .. ممكن اكلمك دقيقه ؟! "
ابتسمت لها " تفضلي "
قعدت ع الكرسي مقـابلي و تنهدت قالت بعد لحظات سكوت .. " تعرفين وحدهـ اسمها مهـا الـ ....... ؟! "
أول مانطقعت اسمها حسيت بحقد و كره موب طبيعي وبنفس الوقت جاني خوف من ان السالفه تتكرر هنا بعد
قلت لها " وش فيها ؟! "
قالت " البنت بالمستشفى من يوم اننا في ثاني ثنوي .. جاها سرطان بالدم "
شهقت و انـا اسمع هالكلام صحيح انها تقرب لي لكن ماوصلني الخبر عن طريق مرت خالي أبد أبد
قالت " و ... هاليومين حالتها زادت سوء ... ادعي لها .. بدال ماتدعين عليها ! "
رديت عليها " الي سوته موشوي عشان كذا ادعي عليها ... وانتي تعرفيني زين يـا نهى انا مستحيل ادعي على أحد لكن هي الي اجبرتني لكن هالعموم .. الله يقومها بالسلامه و آسفه مقدر اسامحها .. "
وقمت و خليتها
يمكن تقولون قلبك قـاسي ... أو حقيره لكن محد فيكم حاس بالي فيني لان ببساطه ولا احد فيكم جرب هالتجربه و ان شا الله محد يجربها أبد ..
بعد 3 شهـور .. جت نهى للجامعه ووجها منصفق و حالتها حاله و نفسيتها زفت رحت لها قلت لها وش فيك يانهى عسى ماشر وش صاير ؟!
فاجأتني وهي تقول " مها .. توفت "
مدري وش اقولكم وقتها .. احساس غريب جاني
مدري أصيح !؟ ولا احس بتأنيب ضمير لاني كنت ادعي عليها ؟! .. ولا افرح بوفاتها !؟ مدري مدري احساس عجيب
بعدت عن نهى كنت محتـاجه اقعد بلحالي وقتها .. اتصلت على اخوي و قلت له يجي ياخذني من الجامعه
طلعت و رجعت لـ البيت وانا إلى الان مصدومه
انا مانكر حزنت عليها يكفي انها وحدهـ اعرفها ... حتى لو انها كانت حقيره معـاي
الله يرحمها ...ويغفر لها ..
والحين مرت سنتين من وفـاتها .. وطبعا كل البنات الي كانو بالمجموعه حاولو يعدلون علاقتهم فيني و يرجعون لكني رفضت .. خلآص .. نفسي عااافتهم ..

سبحـان الله ربي مايخلي أحد
شفت فيهم يوم كلهم من مها ليين اخر وحدهـ في المجموعه
" يمهل ولا يهمـل " ..
وبالنهايـة ..
ياناس اتعضو ترا الظلم شييييييييييييين ... و دعوة المظلوم مستجابة
دعيت عليهم كلهم .. و فعلا شفت فيهم يوم كلهم من أول وحدهـ تكلمت فيهم ليين اخر وحدهـ ..
اما البـاقي ... اترك التعليق لكم على قصتي
ما احلل أي أحد ينقلها بـ " تحريف أو تغير في أي شي " ..


"منقوووووووووووول" للعضه والفائده من تجارب الغير

لقصه طويله لي عوده إن شاء الله

راكان كتب:

لقصه طويله لي عوده إن شاء الله

شكراً لمرورك أخي راكان فمرورك أضفى البهجه وأشعل فتيل الردود لك وافر تحياتي

قصه جميله جدآ
فعل الله سبحانه وتعالى:
" يمهل ولا يهمل "

قصه جميله والله يبعدنا عن هالناس ان شالله

العميد الجهوري كتب:

قصه جميله جدآ
فعل الله سبحانه وتعالى:
" يمهل ولا يهمل "

أشكر مرورك أخي العميد والأجمل هو مرورك ووجود ردودك

فلا تحرمنا تواجدك دمت بود ولك خالص التحيه والسلام

$ alfazariah $ كتب:

قصه جميله والله يبعدنا عن هالناس ان شالله

هلا أختي الفزاريه شكراً لمرورك الجميل فقد أضفى الكثير والكثير من الروعه والجمال لموضوعي

شكرا على القصه الجميله

يمهل ولا يهمل
سبحان الله العظيم

شوقتنا اخوي لتكملة القصة